電影熱話

【 MOVIE6 熱話 】有關《 侏羅紀公園 》系列的10項 Fun Facts

廣告:

有關《 侏羅紀公園 》系列的10項 Fun Facts

《侏羅紀世界︰迷失國度》公映在即,作為《 侏羅紀公園 》系列嘅重啟版電影續集,相信亦都引來唔少影迷嘅注目。係入場之前,都不妨回味一下呢個咁經典嘅系列電影,而你又知唔知以下10個精選Fun Facts呢?

【1】環球影業為《 侏羅紀公園 》第一集重新製作出3D版本,花費1千萬美金,後來重新上映後仲賺咗超過4千5百萬美金,絕對回到本。

【2】史提芬史匹堡並唔係《 侏羅紀公園 》第一集嘅唯一導演人選。當初想拍呢個系列嘅名導包括有添布頓(Tim Burton,《幻海奇緣》、《怪誕屍新娘》導演)、占士金馬倫(James Cameron,《鐵達尼號》、《阿凡達》導演)等等。後來史匹堡獲得《 侏羅紀公園 》嘅電影版權,先拍成今時今日呢套經典電影。如果係第二個導演黎拍,你又想唔想像得到成個風格會變成點?

【3】荷里活嘅環球影城係《 侏羅紀公園 》第一集開拍前已經著手建造 侏羅紀公園 主題嘅過山車設施。然而,呢項設施嘅建造費係《 侏羅紀公園 》第一集製作費嘅兩倍,駛咗大約1億1千萬美金……係美金!

 

【4】因為天雨關係,巨大嘅暴龍機械模型曾經發生故障,喺唔係拍緊戲嘅情況下「翻生」大叫。監製Kathleen Kennedy 仲話過有時可能大家放緊飯嘅時候,隻暴龍就突然「翻生」,然後就聽到有工作人員嚇親大嗌。

【5】第1集中,暴龍整爛車頭玻璃呢一下,其實係意外。塊玻璃一爛,班小演員就叫到拆天,亦都怪唔之得叫得咁真。

《侏羅紀公園》

 

【6】第1集中,一部份鏡頭中嘅恐龍係大銀幕史上第一批以全CG製作出嚟嘅「生物」。首先係要製作1:1比例嘅電子機械模型,然後再以CGI製作出會郁嘅恐龍。

【7】到底恐龍嘅叫聲係點無人會聽過,但係配以創作力量同幻想,《 侏羅紀公園 》入面暴龍嘅吼叫聲係由多種動物叫聲組成!其中包括狗、企鵝、老虎、短吻鱷以及大笨象等等。

【8】《 侏羅紀公園 3》入面隻棘龍 (Spinosaurus)係當時世上最大隻嘅電子機械模型。佢有成12噸重並以水力學操作,所以係水入面操作都無問題。

《侏羅紀公園3》棘龍

 

【9】《 侏羅紀公園 》第1及第2集入面無用到嘅橋段,有一部份被放入《 侏羅紀公園 3》﹐其中包括第3集入面嘅翼龍追逐橋段。本身呢啲橋段係製作第1、2集嘅時候已經去到畫完故事板(storyboard)嘅階段,奈何因為時間同製作預算所限而無拍到。好橋唔好嘥,所以就留返第3集先拍出嚟。

《侏羅紀公園3》

 

【10】攪笑嘅係,史匹堡導演為咗令演員入戲,「幫」演員想像自己見到隻真恐龍,佢係片場扮過恐龍叫聲,演員表示一啲都唔恐怖。

 

文:Angle

3.8
侏羅紀世界:迷失國度
3905 390
侏羅紀世界:迷失國度 侏羅紀公園