電影熱話

【 MOVIE6 熱話 】六個原因點解你要睇《 復仇者聯盟3:無限之戰 》

廣告:

六個原因點解你要睇《 復仇者聯盟3:無限之戰 》

《 復仇者聯盟3:無限之戰 》有啲咩咁好睇,有咁多人睇一次都唔夠,要一睇再睇?每個人睇《 復仇者聯盟3:無限之戰 》都有唔同嘅理由:出於對 MCU 電影嘅愛啦,又或者出於你對陪佢去睇戲嗰個佢嘅愛啦,又或者無咩特別原因只係為咗睇而睇啦,等等。如果你仲未打算去睇《 復仇者聯盟3:無限之戰 》,我有六個原因說服你即刻去買飛!

場面最勁

號稱係 MCU 製作規模最大,《復仇者聯盟3:無限之戰》一開場就已經打過唔停,所有場面都好勁揪好澎湃,絕對唔係講笑。而且 Thanos 無可置疑,係 MCU 最強、最可怕嘅壞人角色,破壞力非常驚人,睇佢單挑復仇者聯盟仲唔係視覺嘅享受!

角色爆多

Marvel 一早透露《復仇者聯盟3:無限之戰》(加埋《復仇者聯盟4》)有超過六十幾個「有名」嘅角色登場,每次見到熟悉嘅面孔出現都會覺得好興奮,個心呯呯嘭嘭。如果有神秘角色或者你無諗過會有機會再出現嘅角色驚喜登場,情緒就更加高漲啦!

無限聖石

由第一粒無限聖石出現開始(又或者大家發現咩係無限聖石開始),就知道終有一日六粒無限聖石儲齊之後,就會有大災難發生。到底 Thanos 可唔可以喺《復仇者聯盟3:無限之戰》儲得齊一共六粒嘅無限聖石?儲齊之後又會發生咩事?即刻去戲院睇就唔駛估估吓!

期待下集

《復仇者聯盟4》將於2019年5月上映。雖然導演話《復仇者聯盟3:無限之戰》同《復仇者聯盟4》係兩齣獨立嘅電影,但係明眼人都知道兩齣電影有直接嘅關聯,而且,兩齣《復仇者聯盟》電影之間仲有《蟻俠:黃蜂女現身》同《驚奇隊長》。有咁樣嘅編排,肯定就係要大家睇咗《復仇者聯盟3:無限之戰》搵定線索先!

片尾彩蛋

MCU 電影嘅片尾彩蛋一向都係唔可以錯過嘅精髓。《復仇者聯盟3:無限之戰》梗係都有片尾彩蛋,而且係一個非常重要嘅彩蛋。好多 Marvel 迷表示睇完呢個彩蛋之後都會異常激動,甚至想歡呼,真係睇幾多次都覺得好激動!

十年感情

最後最後,最緊要嘅其實係十年情。如果你由2008年《鐵甲奇俠》開始就已經追睇 MCU 電影,咁呢十年嚟你對 Marvel 超級英雄一定投放咗好多感情,所以,你又點可以錯過 Marvel Studios 十週年嘅鉅獻,承接18齣 MCU 電影劇情同靈魂嘅《復仇者聯盟3:無限之戰》呢?

 

文:靈光

https://www.facebook.com/huxtin/

靈光一閃,正在尋找《光影星碎》後的《生死幻願》。

4.4
復仇者聯盟3:無限之戰
6399 693
Marvel Marvel Studios 復仇者聯盟3:無限之戰