電影熱話

【 MOVIE6 熱話 】《 藍天白雲 》 梁雍婷 :「無戲開就返 part time!」  

廣告:

《 藍天白雲 》 梁雍婷 :「無戲開就返 part time!」

《 藍天白雲 》是一個中學女生梁可麗 Connie 弒雙親的悲慘故事。Connie 被家庭壓力打敗,被校園欺凌打敗,被社會道德打敗,最後失去了理智。24歲的 梁雍婷  Rachel 在我們眼中卻是一個打不死的樂天派,無時無刻不發放正能量。近年香港影壇有不少新力軍崛起,不過能夠入圍香港電影金像獎「最佳新演員」的名額,每年只得五個。被盛讚在《 藍天白雲 》中表現一鳴驚人,Rachel 回應指「太誇張」 ;她太謙虛了,正是因為她一鳴驚人,所以才有資格入圍。

Y:Yvonne (Movie6) R:Rachel

 

Y:當初係唔係你自己主動去《藍天白雲》試鏡?點解之後又會去咗拍電視劇先?

R:係我自己主動去試鏡,但係選中咗我之後,等咗好耐《藍天白雲》都未開拍,唯有去拍電視劇先,做過離家出走、未婚懷孕嘅角色,唔係死阿爸就係死男朋友,全部都係啲唔開心嘅角色。

Y:仲記唔記得《藍天白雲》試鏡嘅情形?

R:第一次試鏡,張經緯導演畀咗《伊底帕斯王》嘅劇本我哋,心諗呢個劇咁難,要點做好呢?第二次試鏡有劇本,所以我就盡量跟劇本裏面形容嘅 Connie 去演,都係演一啲 Connie 嘅生活日常。終於去到第三次,就係要演《藍天白雲》戲肉嘅部分。

Y:你點睇都同 Connie 呢個角色嘅性格好唔一樣,導演要你點樣去投入角色?

R:要消化劇本,要去 Connie 住嘅地方了解嗰度嘅氛圍。點解《藍天白雲》會有 Connie 上廁所嘅一幕,係因為嗰度真係無馬桶,所以先要用一個筒去代替,呢啲我都要去了解。同埋都真係要靠張經緯導演。佢首先要我放低之前喺浸大電影學院學過嘅所有去飾演 Connie,之後先再學返少少基本技巧,例如點樣用聲,我講嘢唔可以太大聲,角色得嗰十幾歲,我仲要學點樣可以陰沉啲。

Y:你又有無睇過邊啲電影去準備 Connie 呢個角色?

R:有,例如金村昌平導演嘅《我要復仇》、《親切的金子》、《大象》、《沉默的羔羊》、《發條橙》⋯⋯我要去了解一個殺人犯到底有咩特質。我本身唔認同 Connie 嘅價值觀,所以我更加要去認識。

2018年「最佳新演員」競爭非常激烈。外界呼聲最高的,除了有《黃金花》的凌文龍(並同時入圍香港電影金像獎「最佳男主角」),還有《藍天白雲》的梁雍婷。Rachel 先拔頭籌,擊敗小龍奪得香港電影導演會的「最佳新演員」。

 

Y:最終你出色嘅演技令你獲得香港電影金像獎「最佳新演員」提名,又攞到導演會嘅「最佳新演員」。

R:我已經好滿足,有提名係 bonus。至於導演會嘅「最佳新演員」,攞獎嗰一刻嘅感覺好唔真實,因為我哋幾位新演員全部企晒上台,好尷尬,我自己又感動又好亂,唔知自己想講咩,仲要講國語,俾爾冬陞導演笑我普通話差,真係勁樣衰!

Y:大家都讚你係天才演員,你會唔會有壓力?

R:天才演員呢啲名都係人地畀我啫。我無壓力,因為我唔覺得自己係,你哋睇錯人喇。

Y:除咗張經緯導演之外,你仲想多謝邊個?

R:我要多謝教我做戲嘅廖啟智老師。佢好支持我,而且係一種默默嘅支持。喺我無乜收入嘅時候,佢就叫我返去電影學院 sharing,賺返少少車馬費,仲會叫我加油,我真係好感謝佢。雖然佢係好前輩級嘅演員,但係佢畀到學生好多自由,人又 nice。佢睇完《藍天白雲》之後,只係畀咗我一個眼神,我就知道佢想講咩,我真係好感動!有人問我點解會漏咗多謝 Stephy⋯⋯導演會嗰晚我太緊張喇,又要講普通話!我要多謝 Stephy,我都要多謝許鞍華導演、爾冬陞導演、Zeno 顧定軒,佢哋個個都好犀利!大家一齊合作,幫咗我好多。唔係我犀利,而係佢哋真係太好!

發現 Rachel 身邊沒有助手隨行,才知道她是單人匹馬接受我們的訪問。「係呀,我自己一個人上嚟㗎!」如果有一日要 Rachel 放棄演員身分,她大概很快可以重新投入一般打工仔的生活,但我們看得出她絕對不會放棄演員夢。她我希望大家都會記得她扮演過的角色,希望大家知道誰是梁雍婷。

 

Y:知道你中意梅姐嘅電影之外,你中意咩類型嘅電影?

R:超級英雄片,例如《神奇女俠》,又或者好似古天樂嘅科幻片《明日戰記》,我都好有興趣參與!我覺得香港嘅戲路應該要變得更加多元化。我都希望自己可以演一啲要跳舞而又有 dark side 嘅角色,好似「黑天鵝」,因為我十五、十六歲開始表演嘅時候係跳舞先嘅,但係因為我覺得悶,跳舞唔可以講嘢,所以先去試做戲。好耐無 pick up 跳舞,好想跳返舞。

Y:如果之後無戲開畀你拍嘅話,你會點做?

R:無戲開就返 part time!我以前咩 part time 都做㗎,賣啤酒呀,推銷申請銀行提款卡呀,賣有機菜呀,無戲拍我都要生活嘛。不過我相信,只要我心入面仲係好想做演員,就算我有一日離開咗演藝圈,我將來都可以有機會繼續做落去。

Y:可能你唔做演員,我哋會喺街到撞到你做推銷?

R:咁你就知我做演員做得唔好啦,哈哈!

 

機會,已經留給了梁雍婷 Rachel,前途無可限量。

 

訪問:Yvonne

文字:靈光

梁雍婷 藍天白雲