電影熱話

【 MOVIE6 熱話 】走入元朗 YOHO MALL My Cinema 八大「形點」你要知

廣告:

走入元朗 YOHO MALL My Cinema 八大「形點」你要知

如果你家住元朗,應該會知道新元朗中心嘅 百老匯 戲院閉館多年,話要搬去 YOHO MALL,後來到新元朗中心都改埋名變做 YOHO MALL「形點」嘅一部分,戲院都仲未開返。不過大家唔駛再等喇,元朗 百老匯 已經喺 YOHO MALL 搖身一變成為全新 百老匯 品牌戲院 My Cinema ,更加喺上個月尾正式開業!

(一)

My Cinema 上層係票房同小賣部,下層就有八個影廳。設計師利用唔同顏色嘅繩編織出唔同嘅空間感,由上層走到下層,會好似走咗入一個全新嘅空間。戲院仲特登用返商場嘅落地玻璃,日頭嘅時候當陽光照入室內會有光影錯落嘅感覺。

(二)

成年觀眾可以一邊睇戲一邊享用美酒,每日下晝4-7都係 Happy Hour,靚酒買一送一,優惠期去到9月27日。My Cinema 主打唔同味道嘅手工啤,有椰子味、岩梅味、麥味等等嘅口味,亦都有本地品牌生產嘅「獅子山下」、「一代宗師」、「冰山雪蓮」等等。唔飲酒嘅觀眾,戲院入口旁邊有一部可以自己調校口味嘅汽水機畀你哋玩。

(三)

除咗美酒之外,小賣部有得買多款特色小食,包括香草豬肉腸、泰式魚條、香烤墨丸、脆皮豆腐魚等等,另外推介大家試飲一隻桃味嘅日式果茶。睇戲嘅時候唔單只淨係可以食爆谷,喺 My Cinema 仲有好多選擇。

(四)

作為百老匯院線第一間擁有IMAX巨幕嘅戲院,戲院門口有一個大大隻嘅IMAX標誌。走入去影廳嘅通道鋪上紅地氈,令觀眾好似走入星光大道一樣豪華。My Cinema 嘅1院IMAX影廳全院有409個位,leg room 係全港最闊,唔怕行出行入嘅時候會覺得好唔方便。推介大家坐 I/J/K 15-16 附近位置,啱啱好可以睇晒成個熒幕。

(五)

當大家走入IMAX影廳之前,肯定會見到幾張發光嘅「爆谷櫈」。住元朗嘅你對佢哋一定唔會陌生,呢幾張「爆谷櫈」正正就係舊時新元朗中心百老匯戲院嘅遺產,我都有坐過。絕對係各位元朗人嘅集體回憶,大大增加元朗人對戲院嘅歸屬感。

(六)

擁有八個影廳嘅 My Cinema,除咗1院係跟足標準IMAX規格之外,其餘七個影廳都配備咗 4K laser 放映機同精準白幕,比一般影廳銀幕光度多40%,就算坐執邊位都唔會覺得暗。

(七)

至於3院就喺音響設備上有少少 upgrade。My Cinema 同 GDC 合作將 DTS:X 臨境音帶畀觀眾,DTS:X 臨境音其實就係360度環迴立體音效嘅其中一種。我喺3院試聽音效嘅時候坐中間位 J11,睇戲同聽聲嘅感觀一流。

(八)

My Cinema 2D IMAX電影只係一百蚊一張飛,普通2D電影就六十五蚊一張飛,非常超值。My Cinema 推出咗一張由小克設計嘅「禮蜜卡」,可以享有額外嘅買飛、嘢食同酒水優惠,優惠為期一年,張卡仲可以增值添。

 

文:靈光

https://www.facebook.com/huxtin/

靈光一閃,正在尋找《光影星碎》後的《生死幻願》。

IMAX My Cinema 百老匯 靈光