電影熱話

【 MOVIE6 熱話 】《 春嬌救志明 》 志明玩具逐個捉 睇下你買咗幾多樣野!

廣告:

《 春嬌救志明 》 志明玩具逐個捉 睇下你買左幾多樣野!

作為男人,身邊都總會有一兩樣被稱為敗家嘅嗜好。不論係手錶、相機、汽車、音響;定係銀包、波鞋、模型、遊戲機,只要係洗得都唔少錢嘅玩意,都會令男人嚮往。其實無論係幾多歲嘅男人,都一定會有一顆童心,希望可以買呢啲小玩意獎勵一下自己。其實只要適可而止,敗下家又有咩所謂啵~  喺《 春嬌救志明 》入面,志明就係因為買得太多野,先會俾人鬧!我地就數下係電影入面重點出現嘅玩具,睇下你/你男朋友買咗幾多野!

達利手指雕塑品

每個男人點都要有一件達利(志明話),而呢一個達利,其實大有來頭。先同大家講下達利係邊個啦。(達利)薩爾瓦多達利其實係西班牙著名畫家,以超現實主義作品而聞名。就算你未聽過呢個名都一定見過佢嘅作品《憶的堅持》。而講多野冷知識你知,其實珍寶珠上面黃色雛菊的設計正正就係出自達利嘅手筆。而達利手指雕塑品的確同《春嬌救志明》所講嘅價錢一樣係九萬幾蚊,導演彭浩翔仲話志明個番說話其實係導演親身經歷喎。

《記憶的堅持》

電動獨輪滑板

而志明比人話過買左返嚟又唔玩嘅電動滑板,其實都唔平架!話明電動即係價錢起碼一千樓上。就算最平淘寶,計計埋埋都成二千蚊架喇。雖然唔算貴,但買下買下就就唔平架喇。不過可以拎著佢去西環碼頭教靚女玩,都叫值得丫。

Supreme磚

幾時都話買磚頭保值,但呢舊磚頭又值唔值呢?潮牌Supreme挑戰創意極限,連磚都可以作為產品。雖然原價唔算貴(30美元=折合約250港元),但最弊千金易得,一磚難求,係網上最高可以炒到去1000蚊美金!(折合約7800港元)。一部iPhone嘅價錢,你又捨唔捨得呢?

HTC VIVE

鍾意打機嘅朋友,身邊一定要有VR旁身啦。志明比契媽玩個部VR,其實係市面上數一數二貴嘅VR裝置。行貨而家都要大約7000$到。

決策板


咁當然,春嬌自己都有買野玩嘅。喺電影中出現嘅決策板,雖然好似好無用;但係對於有選擇困難症嘅人黎講,簡直係一件不可多得嘅神器。自從電影一出,好多網站都出有同款的產品,大概二三百蚊就有交易。所以春嬌的確係有資格話志明大洗嘅~


文:六仔

六仔 春嬌救志明