電影熱話

【 MOVIE6 熱話 】Fans先睇得出!20個《 變種特攻 》《 盧根 》關聯!

廣告:

Fans先睇得出!20個《 變種特攻 》《 盧根 》關聯!

Hi Logan~《 變種特攻 》時間軸係唔係好亂?係,但係無阻《 盧根 》成為一齣非常出色嘅《 變種特攻 》電影以及《 狼人 》系列外傳作品。《 盧根 》入面有好多細節,都可能係《 變種特攻 》電影粉絲先至睇得出,就等作為頭號粉絲嘅我大爆廿個《 盧根 》同過往咁多集《 變種特攻 》嘅關聯!

!超多劇透 ALERT!

狼人物品篇

武士刀


認真留意狼人住嘅地方掛咗一把武士刀。唔知道喺新嘅時間軸佢幾時去過日本,但係把武士刀應該就係《狼人:武士激戰》入面矢志田送畀佢嘅嗰一把「斷斬」。

狗牌


狼人係《變種特攻2》舊嘅時間軸裏面抌咗佢塊狗牌喺鹼湖基地嘅雪地上面,不過喺新嘅時間軸,狼人似乎一直留住佢塊狗牌,一直留到2029年。

DNA


《變種特攻:天啟滅世戰》片尾有交代,Essex Corp. 喺鹼湖基地收集咗狼人嘅一枝基因資料試管,正正就喺 呢枝嘢創造咗 X-23。

雪茄


當狼人喺便利店攞走幾條雪茄,大家應該都識笑。狼人最愛雪茄,今集點可以無呢?

超能鋼子彈


喺《變種特攻:狼人外傳》結尾,狼人俾一粒超能鋼子彈射中頭而失憶,而今集佢竟然留住咗一粒超能鋼子彈「以備不時之需」,究竟佢係點樣攞到呢粒子彈㗎呢?

️劇情篇

鹼湖


呢個鬼地方令狼人不得安寧。好多集《變種特攻》嘅電影都同鹼湖有關,難怪狼人一收到 Donald Pierce 張卡片就即刻爆粗。

卡利班


雖然換咗演員,但係《盧根》裏面嘅卡利班(年輕版)應該同《變種特攻:天啟滅世戰》嘅卡利班(年老版)係同一個人,不過就無詳細交代佢咁多年嘅去向,只係知道佢曾經做過壞人。

籠中之人


X教授一開始提到變種特攻最初搵到狼人嘅時候,佢係一個 「cage fighter」,亦即係《變種特攻》狼人出現嘅第一幕。不過值得留意嘅係,X教授第一次搵到狼人嘅時間其實發生喺《變種特攻:異能第一戰》,佢同磁力王行入酒吧畀狼人趕走。

自由神像


當X教授同狼人講有人喺自由神像等緊佢,狼人答早就無自由神像,雖然X教授係指一間叫做「自由神像」嘅旅館,但係狼人其實係指《變種特攻》嘅劇情,同磁力王喺自由島嘅一戰摧毀咗自由神像。

Weapon X計劃


同鹼湖一樣,由《變種特攻》第一集出現狼人嘅記憶片段開始,一直到《盧根》,喺狼人體內植入超能鋼嘅Weapon X計劃從來都無停止過令佢發惡夢,製造 X23 嘅計劃前身都係 X武器計劃。

羅剎


電影入面出現一本X-Men漫畫,其中一頁講狼人拯救羅剎,而《盧根》其中一個主題係「父子」/「父女」感情,狼人一直都當羅剎係女一樣照顧有加,相信都係前作遺留落嚟嘅一個情意結。

家庭溫暖


如果狼人走入民居住一晚,嗰家人都唔會有好結果。《變種特攻:狼人外傳》嘅慘劇再次發生,難怪狼人最初堅持唔想受人恩惠,因為有前科。

睇醫生


喺《狼人:武士激戰》入面狼人因為受重傷,Mariko 帶咗佢去獸醫診所睇醫生,而今集 X-23 亦都帶咗狼人去一間普通嘅門診接受治療,不過明顯異變人喺新嘅時間軸裏面早就被人類接納,雖然已經絕晒種⋯⋯

偷車賊


狼人教X-23唔可以不問自取就偷其他人嘅車,但係講講吓就講唔到落去,應該諗起自己都係慣犯,最記得佢偷鐳射眼部電單車。

森林狂怒


《盧根》高潮一幕,狼人為咗保護 X-23 而喺森林發狂戰鬥,同《變種特攻:兩極爭霸》嘅佢為咗見靈鳥而喺森林疾走一幕非常相似。

X教授篇

Cerebro

X教授一開始藏身嘅地點睇落去就似足Cerebro,令人好感慨。

藥物閹割

 

用藥物去抑制X教授嘅能力都唔係第一次,尤其喺《變種特攻:未來同盟戰》裏面X教授主動打針令自己失去異能從而可以行得返路,都幾令人心痛。

爆粗教授

柏德烈史釗域可能係第一次以X教授身分喺銀幕前爆粗,但係X教授本身都唔係講粗口會打冷震嘅人,後生版嘅X教授就已經爆過一次粗。

頭盔


無Cerebro,就無頭盔,所以X教授今次戴圓帽頂住當先,而圓帽其實係磁力王嘅日常飾物。

入屋救駕


狼人出盡力用爪「爬」入酒店房救X教授嘅一幕,同《變種特攻:兩極爭霸》狼人闖入靈鳥舊居救X教授嘅一幕都好相似,真係有好多洋蔥。

文:靈光

https://www.facebook.com/huxtin/

靈光一閃,正在尋找《光影星碎》後的《生死幻願》。

【 MOVIE6 影評 】《 盧根 》如果可以再來一次

【 MOVIE6 熱話 】狼人 ・ 盧根・ 曉治積曼 15件你不知道的趣事

【 MOVIE6 熱話 】本週主打:《 盧根 》

【 MOVIE6 熱話 】直擊《 盧根 》 曉治積曼 柏德烈史釗域 訪台行程!

狼人 盧根 變種特攻 靈光